FerðinFerðin gekk alveg hreint prýðilega, lögðum við af stað upp úr 4 í gær og byrjuðum við á að keyra í gegnum hlaðið á Möðruvöllum þar sem heimsækja átti Nonna en Nonni var víst fluttur í eitthvað hús á Akureyri þannig að við sáum hvorki tangur né tetur af honum, en við sáum Skipalón þar sem ísbjörninn kom að landi í sögunni. Eftir íbjarnasögur var Hjalteyri sótt heim. Ætlunin var að festa á mynd húsið sem Stína ólst upp í en það var ekki hægt sökum þess að 2 grimmir varðhundar pössuðu húsið og urruðu grimmilega þegar við tókum upp myndavélina, hafa sjálfsagt haldið að þarna væru paparassar á ferð. Við gátum allaveg séð húsið og einnig sáum við slottið sem afi Stínu á en því miður sáum við ekki plastbátinn hans :( það býður bara betri tíma! Rúntuðum við um eyrina og bullaði ég upp einhverja sögu sem mér fannst hæfa staðunum. Það má svo ekki gleyma því að auðvitað sýndi ég húsið sem faðir minn ólst upp í!
Næst brunuðum við út að Fagraskógi þar sem við áttum stefnumót við Davíð nokkrun, smelltum við myndum af okkur þar og svo leiddi Davíð okkur í lundinn og las fyrir okkur ljóð. Eftir þennan skemmtilega ljóðaupplestur rendum við út á Dalvík þar sem við áttum einungis stutta viðdvöl í þetta skiptið þar sem við ákváðum að drífa okkur til Ólafsfjarðar því hungrið var farið að sækja á okkur. Stefnan var tekin á sjoppuna þar sem við höfðum heyrt að Gísli nokkur Hvanndal væri að vinna. Eins gott að við nestuðum okkur (sultukex) fyrir ferðina þar sem sjoppan hans Gísla var lokuð og engan mann að sjá, ekki einu sinni Gísla. Eftir fíluferðina í sjoppuna fórum við að Holmenkollen þeirra Ólafsfirðinga, þar sem við vorum með myndavélina á lofti fannst einhverjum stelpum á Ólafsfirði best að spurja okkur "whats your name?" þar sem þeim fannst við eitthvað ferðamannalegar :)
Brunuðum við því næst aftur til Dalvíkur til þess að skola af okkur ferðarykið. Höfnin var í kaldara lagi þannig að við settum stefnuna á sundlaugina. Svömluðum við í sundi í held ég einn og hálfan tíma með mönnum og skjaldböku. Við vorum síðastar upp úr lauginni og kom það mér á óvart hve illa lauginn er nýtt á kvöldin, eftir 7 vorum við þarna ásamt einum tattooeruðum manni, okkur stóð nú samt ekki stuggur af honum. Eftir sundið rúnuðum við um Dallas, sáum sjoppuna "Dallas" og heimsóttum Jóhann "hávaxna" kenndan við risa en það þykir dónaskapur að uppnefna fólk en ég vona að ég hafi komið þessu til skila þannig að allir skilji. Festum við hann á filmu til þess að eiga sönnun þess að hafa "hitt" hann. Eftir rúnt um bæinn og mikla myndartöku yfirgáfum við borgina og fórum á vit ævintýranna í minna stöðum svo sem Árskógssandi og Hauganesi en það var því miður ekki mikið um að vera þar í gærkvöld þegar við renndum þar við, vonandi hittir betur á þegar ég kem þangað aftur einhverntíman seinna.
Það má segja að ferð þessi verði ógleymanleg, hún var hreinlega snilldin ein það vantar ekki. Ég tók náttúrulega sögustund á leiðinni þar sem ég fræddi um það sem ég vissi, bæði umhverfi, sveitabæji og búalið. Að lokum langar mig til þess að þakka ferðafélaga mínum fyrir frábæra ferð!